Marami sa atin madalas susuko na lamang kapag nakadama ng hirap sa buhay, mabilis mapanghinaan ng loob lalo na kung hikaos na maituturing. Hindi naman natin masisisi ang ilan sa mga kababayan natin kung pagsuko agad ang kanilang nagiging solusyon sa bawat suliranin na kakaharapin sa buhay.
Kung marami sa ating kababayan ang madaling mapanghinaan ng loob ibahin ninyo ang kwento ng isang dating tindera ng gulay at 4P’s member na si aling Miguelina Villasor 54-anyos na taga Barangay La Union sa San Remigio, Antique. Bagaman aminado si aling Miguelina sa hirap na pinagdaanan sa buhay ito ang naging sandigan niya upang makaahon at mapagtapos ang kanyang dalawang anak sa pag-aaral habang ang iba ay patuloy sa pag-aaral.
Paglalahad ni Aling Miguelina sa panayam sa kanya ng isang programa, siya ay isang tindera lamang ng gulay at prutas sa palengke ng Sibalom, helper naman sa bukid ang kanyang mister,at kung minsan umeekstra din sa mga iba’t ibang trabaho. Kwento ni aling Miguelina taong 2012 ng matanggap sila sa programa ng ating gobyerno na Pantawid Pamilyang Pilipino Program o kilala sa tawag na 4Ps. May isang Department of Social Welfare and Development ang naka assign sa kanila na siyang nakapansin at nanghinayang kung bakit tinatapon lamang ni aling Miguelina ang turmeric kapag hindi nabenta.
Sa tagpong iyon napagsabihan si aling Miguelina patungkol sa dulot na benepisyo ng turmeric sa ating katawan, kaya naman hindi na nag-aksaya ng oras si aling Miguelina at sa taong 2013, nag-aral siyang magproseso ng turmeric sa tulong ng Sustainable Livelihood Program (SLP) ng DSWD kung saan pinagkalooban siya ng puhunang PHP10,000. At dito na nga nag-umpisa ang lahat, paglaon ay nagkaroon ito ng sariling label ng kanyang turmeric products.
Anya “Nagsimula akong magproseso ng 20 packs na may timbang na 100 grams ng turmeric kada linggo. “Noong umpisa, kada linggo kumikita ako ng PHP2,000.” Hanggang sa naglaon nagkaroon pa siya ng tinatawag na turgin na ang sangkap ay pinaghalong turmeric at ginger. Nagustuhan din naman ng mga tao ang turgin at may bumibili sa mga ito.
Di naglaon ang dating 20 packs ngayon ay 100 packs na kada linggo at umaabot na sa 35K hanggang sa 50K ang kinikita niya kada linggo. Dagdag pa niya “Dito lang talaga namin kinukuha ang pampaaral sa aming mga anak. Sa benta ng turmeric at turgin sa palengke.
“Yung panganay ko, graduate na ng civil engineering at yung sumunod naman graduate ng electrical engineering. Mga nagtatrabaho na.”
“Yung pangarap ng aming mga anak na makatapos ng pag-aaral ang naging dahilan kaya nagsipag kaming mag-asawa.
“Nagpapasalamat din kami sa tulong ng gobyerno. Pinagsikapan naming sumunod sa mga kondisyon ng Pantawid Pamilya Program, at tiniyak naming nag-aaral na mabuti ang aming mga anak.”
Hindi naman naging madamot si Miguelina bagkus itinuturo niya ang kanyang kaalaman sa kanyang mga kapitbahay kung paano gumawa ng turmeric tea at siya din mismo ang bumibili sa mga tanim na turmeric sa kanilang lugar. Dahil sa husay at pagiging inspirasyon sa nakakarami, binigyan parangal si aling Miguelina at ang kanyang pamilya ng DSWD bilang Huwarang Pantawid Pamilya (provincial level) noong 2017.
Nakakatuwang isipin na kabila ng hirap ng pinagdaanan ni Miguelina ay hindi nito sinukuan ang pangarap na naging gasolina para magsikap at mapagtapos ang kanyang mga anak.